«جاسىل ەكونوميكانى دامىتۋ – اسا ماڭىزدى مىندەت. كليماتتىڭ وزگەرۋى كوپتەگەن جاھاندىق سىن-قاتەرلەر تۋدىرىپ وتىر. بۇل – بۇكىل حالىقارالىق قاۋىمداستىقتى الاڭداتىپ وتىرعان ماسەلە. ونىڭ ەكولوگيالىق سالدارى ەلدەرىمىزدىڭ وركەندەۋىنە كەدەرگى كەلتىرەدى», دەدى مەملەكەت باسشىسى.
پرەزيدەنت «تۇركى جاسىل قارجى كەڭەسىن» «استانا» حالىقارالىق قارجى ورتالىعىنىڭ جاسىل قارجى ورتالىعى نەگىزىندە اشۋعا بولاتىنىن اتاپ ءوتتى.
«الەم ەلدەرى سوڭعى 7 جىلدا «جاسىل» وبليگاتسيالارعا 2,5 تريلليون دوللاردان استام قارجى ءبولدى. وسى رەتتە, مەن بۇل سالاداعى كاپيتال نارىعىن دامىتۋ ءۇشىن «تۇركى جاسىل قارجى كەڭەسىن» قۇرۋدى ۇسىنامىن. ونى «استانا» حالىقارالىق قارجى ورتالىعىنىڭ جاسىل قارجى ورتالىعى نەگىزىندە اشۋعا بولار ەدى. بۇگىندە «استانا» حالىقارالىق قارجى ورتالىعى الەمدەگى ءىرى كومپانيالار اراسىندا تانىمال بولىپ, جوعارى دەڭگەيدە مويىندالدى. ول جاڭا كەڭەستىڭ حاتشىلىعى قىزمەتىن اتقارا الادى», دەپ قوستى ق.توقاەۆ.
